thomas demetz
la rajons de vester candidat

Viver la zità

Viver la zità uel dì viver te uni luegia y la trasfurmé te n luech de ancunteda, da plaza Walter nfin dan porta de cësa de uni zitadin, uel dì crië y renfurzé relazions plëines de pusciblteies criatives y nia mé lueges da passé tres.

Viver la zità uel dì jì ora de cësa, jì ora de auto per se mescedé cun i autri, ancunté defrënzies che chësc mond nes fej udëi uni di, uel dì tré ora l guant da jì a spaz y tré sëura chël dl viajadëur che va ala scuvierta de tan de energies che chësta zità pieta.

Viver la zità uel dì vester curiëusc, dé su na pert dla usanzes da uni di, per se arichì cun l cuntat, dé su l cunfort ciaudin dla usanzes da uni di.

Viver la zità uel dì dé inant nosta ideies personeles y tò su chëles di autri. L ne se trata nia de solidarietà y nianca de vester pulticamënter iusć ma de ueia de comunità.

Viver la zità se damanda cuntemporaneità y l lauré ora de stories culetives y ndividueles per pudëi mëter adum n statut de zitadinanza nuef plu pensà sëura y atif.

Viver la zità ie n proiet che à l obietif de valorisé la defrënzies y i cuntribuc di singuli, de fé cunëscer la identiteies y cultures, de fé su nsediamënc nueves, de realisé na zità de cualità emanzipeda y ntegreda.

 

Persones y zità

La persones ie l motor dla zità. Si ideies, pascions, sëmies, dejideres, aspetatives ie l’energia che regor tla vëines de Bulsan, che animea y fej crëscer chësta zità. La persones determinea l daunì dla zità; les fej ora la storia dla zità che ie metuda adum dala stories ndividueles de uni zitadin. Ala persones che viv, fej su y abitea uni di te chësta zità ti spieta l dërt de tò pert ala dezijions che determinea i urizonc de svilup. L proscimo Cunsëi de Chemun messerà fé ora cie che l sarà dla zità ti proscimi diesc ani y la persones che viv te chësta zità y uel realisé si sëmies dëssa pudëi avëi l dì a na maniera ativa y costrutiva tl lauré ora la politiches zitadines. L proscimo Cunsëi de Bulsan messerà se purvé de garantì te na maniera tlera y efizienta la partezipazion di zitadins ala dezijions ajache uni zitadin muessa unì valorisà te si zità.

Ladins y zità

Tla elezion che vën reprejentea la populazion ladina de Bulsan n’ucajion mpurtanta de sperimentazion pulitica. L ie unì a se l dé che i Ladins ne sentiva nia plu l bujën de se lië a n partit politich che se basa sun si rujeneda dl’oma y chësc mostra su plu cosses. Dantaldut desmotra i Ladins de se avëi nravisà ite te zità. I tol ite pusizions che desmostra che i ie atifs y prutagonisć te duc i ciamps dl mond dla prufescions, dl’aministrazion publica y dla lies. Sëuraprò ie l sfanté tla zità de Bulsan de na forza pulitica che se basa dantaldut sun la scunanza dla ntegrità culturela y la adesion cuntemporanea di Ladins a proiec politics desvalives, n seniel tler sun l livel de madurità pulitica aut che caraterisea la zità de Bulsan y sun la stredes che la dimenscion pulitica te Südtirol possa tò ite tl daunì. Chësta dimenscion ti dà gran mpurtanza ala prupostes y ai cuntenuc y va sëura i cunfins for plu y plu labils danter la grupes linguistiches ora. La populazion ladina tol a chësta maniera su na ndesfideda cun la cuntemporaneità y mostra su che la defrënzies reprejentea dantaldut na richëza y che l cuntribut che ëi possa dé ala vita politica dla zità dla provinzia ncueicundì y tl daunì se gëura dantaldut tl vieres dl’afermazion di cuntenuc y dl jì sëura la strentures ora.

L mpëni pulitich di Ladins de Bulsan ie n lauratuere pulitich mpurtant che arichësc la vita de zità cun l’esperienza dl plurilinguism che porta pro a renfurzé l prozes de ntegrazion danter la grupes linguistiches y tl daunì nce danter la cultures dl luech y chëles da caprò.